Athugið: Þessar síður fjalla um forsetakosningar 30. júní 2012.
        Smellið hér til að skoða upplýsingar í tengslum við alþingiskosningar 29. október 2016


Fréttir

Sjö frambjóðendur skiluðu inn framboðum til kjörs forseta Íslands 30. júní

26.5.2012

Frambjóðendurnir sjö eru:

  • Andrea Jóhanna Ólafsdóttir
  • Ari Trausti Guðmundsson
  • Ástþór Magnússon Wium
  • Hannes Bjarnason
  • Herdís Þorgeirsdóttir
  • Ólafur Ragnar Grímsson
  • Þóra Arnórsdóttir

Í 4. gr. laga um framboð og kjör forseta Íslands, nr. 36/1945, segir að framboðum til forsetakjörs skuli skila eigi síðar en 5 vikum fyrir kjördag til ráðuneytisins ásamt samþykki forsetaefnis, nægilegri tölu meðmælenda og vottorðum yfirkjörstjórna um að þeir séu kosningarbærir. Einnig segir í lögunum að ráðuneytið skuli auglýsa í útvarpi og Lögbirtingablaðinu innan viku hverjir séu í kjöri til forsetaembættisins og afgreiða til hæstaréttar öll framangreind skjöl.

Fundur með forsetaframbjóðendum og/eða fulltrúum þeirra var haldinn í innanríkisráðuneytinu 26. maí 2012.Frambjóðendur og/eða umboðsmenn þeirra komu til fundar í innanríkisráðuneytinu í dag, laugardag. Þeir voru Andrea Jóhanna Ólafsdóttir frambjóðandi, Ólafur Þórisson, umboðsmaður Ara Trausta Guðmundssonar, Ástþór Magnússon Wium frambjóðandi og umboðsmaður hans, Jón Pétur Líndal, Sigurður G. Guðjónsson, umboðsmaður Ólafs Ragnars Grímssonar, og Guðrún Björg Birgisdóttir, umboðsmaður Þóru Arnórsdóttur.

Tilgangur fundarins var að upplýsa um þau framboð sem lögð voru inn innan tilskilins tíma, greina frá þeim gögnum sem lögð voru fram og gefa aðilum kost á að tjá sig um þær upplýsingar sem kynntar voru og settar voru fram á fundinum. Einnig var tilkynnt að ráðuneytið muni í síðasta lagi 31. maí auglýsa um framboð til kjörs forseta Íslands. 

Ragnhildur Hjaltadóttir ráðuneytisstjóri stýrði fundinum og bauð fundarmenn velkomna, greindi frá tilgangi hans, lýsti því að sjö frambjóðendur hefðu skilað inn gögnum og að framboð yrðu auglýst innan viku. Fundarmenn kynntu sér gögn sem lágu frammi. Ástþór Magnússon Wium óskaði þess að færðar yrðu til bókar athugasemdir sínar þess efnis að hann sæi á framlögðum meðmælendalistum annarra frambjóðenda sömu rithönd. Óskaði hann eftir að aðrir listar yrðu kannaðir með hliðsjón af þessari athugasemd.

Innan viku mun ráðuneytið hafa lokið yfirferð framlagðra gagna til að staðfesta lögmæti þeirra og í kjölfar þess undirbúa framangreinda auglýsingu um hverjir eru í framboði til kjörs forseta Íslands.